林滿足兮臺語詩文
ㄧ.南 部 秋 天 兮 田 園
南 部
秋 凊 兮 山 頭
黃 昏 時 陣 小 雨 後
駛 車 園 裡 踅 透 透
花 蕊 大 小 當 妖 嬌
柑 仔 枝 枝 結 纍 纍
柳 橙 粒 粒 亦 飽 水
楊 桃 矮 矮 真 古 錐
紅 柿 黃 黃 更 加 嫷
紅 葉 公 園 葉 轉 紅
感 覺 卡 實 足 迷 儂
即 款 可 愛 兮 田 園
安 怎 不 知 卜 疼 痛
踳 踏 佫 卜 送 予 儂
平 安 快 樂 是 美 夢
台 員 若 卜 有 向 望
想 法 逐 家 愛 相 仝
(相關詩篇)
二.罩 霧 兮 早 起
罩 霧 兮 早 起
初 春 兮 迷 戀
恬 恬 停 佇 le
未 播 秧 兮 田 園
罩 霧 兮 早 起
波 浪 sak4 海 岸
痴 情 兮 倚 倚
是 遊 子 兮 心 情
茫 霧 漸 漸 清
青 鳥(1)早 出 航
心 內 猶 原 歇 規 排
思 鄉 兮 杜 鵑(2)
註：1.李商隱「無題」有詩句「青鳥殷勤為探看」。詩句中「青鳥」代表帶信者。
2.李商隱「錦瑟」有詩句「望帝春心託杜鵑」。「杜鵑」代表思念的心情。
三.福 氣
|
我一直卜問人：汝敢捌看去一群跳水上芭蕾的魚？一陣咧指揮演奏的羊眩仔？抑有跳踢踏舞的狗仔佮哼RAP的白翎鷥？ 逐年節氣行到夏至，天地漸漸燒熱，日頭愈來愈大。台南市四周圍的溪邊，生態就無仝。細隻細隻的羊眩仔<招潮蟹>滿溪墘；冇 黃昏的夕陽紅帕帕，長長的倒影印佇水頂，水色變甲足豐富；淺紅、深紅、柑仔紅、金紅。啊！即款的色彩無地看，只有即陣看會著。 面前有一隻魚濆 防風林裡新孵出的鳥仔kiann2 ，猶袂學飛。鳥母嫌阮侵入in1的地盤，紲來咬魚共人噴，干礁無歡迎遮兮人客。嘛有含＜kam5＞沙噴甲人規身軀兮，一點仔都無客氣，擱歹銃銃＜ching3＞，看甲亦好氣亦好笑。 即款充滿活力的土地，捌的人無濟；有時外國踅透透，嘛罕得看見，看會著確實是福氣。 |
四.四月失業率創新高有感
|
紫荊紅顏笑春風 板絮[註1]顛狂舞晴空 只為曉燕吟歡夢 那知愁容悲寒冬 [註1]:板絮是指黑板樹的種子.四月底會隨風到處飄送. |
五.逶《千金譜》生理人的風流韻事
談＜走婚＞制度
|
《千金譜》內文有一段講著生理人已經有妻妾，出外看見蘇州婆，
少年佮娞， 心肝迷迷迷， 紲來放蕩破了錢。
予人聯想到即碼台商去大陸投資，
聽講嘛攏包飼〝二奶〞 〝三奶〞， 甚至〝四奶〝，
造成二奶為著爭權奪勢，
紲反倒轉來聯合台灣的元配， 進行跨海官司的新聞 。 自古以來，足濟因為男人有錢著風流，
造成夫妻感情袂合， 家庭破裂， 影響下一代。
甚至有女方，為著男方移情別戀來自殺。徛佇女性的角度，看即款的現象，
總是淡薄不平。
敢無別種，較平衡，擱符合感情需要的婚姻制度嗎？ 人類學家70年代佇雲南瀘沽湖邊，
發現一個摩梭族，是實行奇異的〝走婚〞制。
世世代代，採取母系氏族大家庭制度。鋛咧處理男女感情的方式
，佮咱漢民族完全無仝， 真有意思。
藉這個機會，分享逐家。 摩梭族人的母系家庭成員，是由外媽佮母親的後代子孫組成。母子毋免分家，所以母親阿舅是生活作伙。男無蕌
，女無嫁，一
個家庭內面，攏是母系血統，無父系成員。
整個家庭由母親支配， 有伊崇高的地位，
親屬關係只有外媽、舅、姨、後生、 查𠗟； 無𠗟婿
，大家新婦，叔孫仔，大姆 、小嬸的關係
。家族的女人生的𣿅仔，著是家己的𣿅仔，無分汝我；𣿅仔亦無分姨、
母，一律攏叫阿母。莫怪予人叫做女兒國。 按呢鋛卜安怎傳宗接代？摩梭族人有一個「走婚」制，佇14歲，男女著會使參加各種慶典，互相來熟似定情。查珯摳查某手心三下，對方若有回應，暗時，就會使去女方蹛的花樓，鬥陣過瞑。毋拘透早天未光
，男方就愛恬恬離開。這就是浪漫的「走婚」。 「走婚」是建立佇自由戀愛，純以感情做基礎，
不受法律、 宗教、 地位、 經濟約束
。如果二人感情散去， 查珯無來相揣，或者是查𣿅仔無擱開門接接，
這段關係自自然然就來結束。女方若是有身，生落來的𣿅仔，䊵隨母親生活
。二人的婚姻關係，純粹看感情，
無人會怨嘆對方辜負。 摩梭族人一生會凍走婚幾若擺，
但是袂使同時有二個以上的伴侶。
這種「走婚」制度，允准雙方變換另外一半
。將聯繫婚姻的條件，訂佇感情上，毋是干礁道德、物質上的責任。
而且男女雙方終世人徛佇母家， 採取分居制度，
講來嘛是足先進。
＜魯迅＞先生捌講：只有蚼蟻這種動物，才成群結隊，
獅 、虎這類的高級動物， 攏是獨來獨往。
只是季節性，走揣一個異性同居， 生了𣿅仔，䊵擱各奔東西。
基本上嘛是「走婚制」。 現代人受著傳統婚姻制度的約束，
有足濟是〝貌合神離〞，勉強痛苦生活作伙。
是毋是會使選擇即款走婚的方式，
來解決複雜的婚姻問題？ |
六.我上蓋懷念的一首歌謠
「苦楝若開花，就會出雙葉。苦楝若開花，
就會出香味。紫色的花蕊，隨風搖隨雨落。-------------
--」紀乃函小姐優美的歌聲，將莊柏林先生的詩詞，唱甲足有感情，嘛深深感動著我。就按爾，自迄擺暗會聽了後，苦楝紫色的花蕊就變成，我逐年春天掛吊的對象。毋那是佇校內欣賞伊的媠；街路邊，溪仔漧，堤岸頂，山林內，攏會刁工去找揣伊的形影。 苦楝的花細細蕊，淺淺的紫色，規撮生做伙。三月初花葉仝齊迸（piak4）出來。若無張持看，是啥乜物著看袂出。伊的香味清清，無像玉蘭、茉莉赫爾香，著愛倚近跡鼻有。仝即陣抑有色豔大蕊的斑芝咧開花，大多數的人干礁看見<人因>
的存在，較少人會去注意著幽雅的伊。其實，紫色幼秀的苦楝仔花，恬恬開佇咧藍藍藍的四月天，往往予人產生即種和諧安詳，有夠幸福的感覺。這是佇別字種花身上看袂著的氣質。 我即款的熱情，免不了會感染四箍輪轉的同事、學生，
即碼嘛知卜去欣賞春天的苦楝花。逐家相招陶醉踮紫色的花香中，確實足趣味。 五、六月熱人到了，葉仔愈來愈蓊，拄會遮日。毋拘即陣，花蕊紲著愛離葉離枝，隨風搖隨雨落。有通時矣，看甲誠毋甘，想卜做迄號癡情的葬花人，卻是真驚去予人笑痟个，只好將即份深情匟咧心肝底。無奈來看伊墜落紅塵，化為烏有。唯一會當做个，是一擺擱一擺來聽著迄首歌_______
「苦楝若開花，就會出雙葉。苦楝若開花，
就會出香味。紫色的花蕊，隨風搖隨雨落。-------------」期待明年再相會
﹗
七.就台灣歌謠看台語用字
民視播出的台語連續劇「親情勿計較」，收看的觀眾真濟。其中有一首主題曲「家後」歌詞有意境，旋律優美好聽，相當受人歡迎。即首歌完全免看歌詞著聽有，一來是，主唱的歌手江蕙小姐台語發音足老(lau2)；二來是規首歌曲攏照台語聲調的音樂性咧走；會使講作曲者鄭進一先生對台語嘛真內行，值得逐家共伊拍噗矣。毋過有一點仔可惜个是佇用字方面，猶原有足濟受著北京語思考的影響煞烏白鬥。恐驚透過媒體的宣傳，一般人受著遮个用字的影響，致使台語用字的變甲愈花。阮遮个推搡(sak4
)台語文的友志佇董教授峰政的指導下，利用社區大學上課的時間，一字一字來稽考研究。向望佇逐家努力拍拼之下，揣出較適當的用字，來予鄭先生做參考。按爾也較袂予人講咱台語歌是濫糝舞，烏白湊的物件。順紲藉著美妙的歌曲，吸引聽眾學習台語的興趣，一舉兩得，確實是一件有意義的工課(khong1-khue3
)。 佇用字的原則，分做漢語語源佮非漢語語源(如：越語、平埔語、日語、英語等)： (一)漢語語源字：使用本字，比如「山、水、月、花、雪、春、夏、秋、冬、冊」、鼎、走」、五官名(心、肝、脾、肺、腎)、植物名(樹、木、花、草、根、林)、動物名(獅、虎、豹、鱉、猴、狗)，因為本來着是古漢字，所以無問題。尤其若了解文白音對應的關係，足濟喙舌咧講的話，攏嘛揣會着適當的字。拄好，董教授是即方面的專家，予阮有請教的對象兼省了真濟麻煩。 (二)非漢語語源字：使用方言字：方言字著是各地區，按照家己的口音所使用的文字，所以台灣話特有的語詞，是愛用方言字做根據。方言字借字有二個基本原則：一、擬(gi2)音字原則、二、借義字原則。比如： (1)擬音字：方言特有的詞，語源已經無法度考證的時，才照約定俗成的擬音字。不爾過「擬音」愛用台灣話的本音。比如：查甫(男人)、查某(女人)、啥乜(mih4什麼)、卜(beh4，要)、捌(bat4，曾經)、 緣投(英俊)、阿/呵咾(誇獎)、散赤(貧窮)、袂(be7，不會)。 (2)借義字：又叫做「訓讀字」，借義字著是借用華語的「字義」來讀台語的音。有一寡台語揣無適當的漢字，使用擬音字擱無妥當的情形下，只好用訓讀字。但是訓讀字愛儘量避免。比如：的(e5)、到(kau3)、才(ciah4)、娶(chua7)。 (3)羅馬字：若是遇着外來語佮一寡表達聲音的字，無法度用適當的漢字來書寫；咱着需要借用羅馬字，讀起來較正確。比如：KTV、inn1-inn1-uainnh8-uainnh8
。 (三)台語漢字的選用：基本上愛符合三個條件，(1)聲韻、(2)聲調、(3)意思。尤其聲韻、聲調是根據台語發音才有準算。台語發音根據「文白音異讀對應」佮「反切音的使用」，總是愛有社會基礎佮聲韻的根據，是袂使濫糝使用，比如： oo1-pang1：若寫「黑板」是訓讀用，意思有對(tui3)，但是聲韻、聲調無正確，因為讀做「hik4-pan2」，所以毋是台語的用字。愛寫「烏枋」才有符合選用的三個原則。 u7
khang1 bo5 sun2：若寫「有孔無筍」，是烏白鬥的字。因為「孔」讀做khong2-khang2二音，聲調無對；「筍」是聲韻、調有對，但是意思無正確。愛寫做「有空無榫」。 kha1：寫「跤」勿寫「腳」是因為 跤：口交切→khau2+kau1=khau1/kha1
(au-a有文白音對應，如：教、孝、拋) 腳：居勺切→ku1+sioh4/siok4=kioh4/kiok4
(如：腳數─腳本) 其實即碼台語的用字，有八成以上已經有法度用漢字來處理，嘛攏經過真濟專家用心研究稽考出來。小部份猶無共識的字，著各人用各人的，抑是規氣用羅馬拼音字代替；相信未來即款現象會漸漸來改善。 即嘛咱著介紹「家後」原本的歌詞用字，然後才一句一句來探討伊的用字是毋(m7)是有適當。原則上若是無異議个，囥一邊無擱討論。若是有爭議的字，就伊音、義兩方面來探討。因為台語用字毋是音抑是意思符合着會使，絕對愛音、義攏無爭議，才是上正確。 家
後
詞：陳維祥
曲：鄭進一
主唱：江蕙 有一日咱若老，找無人甲咱友孝，我會陪你坐惦椅寮，聽你講少年的時陣，你有外行，吃好吃醜無計較，怨天怨地嘛袂曉，你的手我會甲你牽條條，因為我是你的家後。 阮將青春嫁置恁兜，阮對少年跟汝跟甲老，人情世事已經看透透，有啥人比你卡重要，阮的一生獻乎恁兜，才知幸福是吵吵鬧鬧，等待返去的時陣若到，我會讓你先走，因為我會嘸甘，放你為我目屎流。 有一日咱若老，有媳婦子兒友孝，你若無聊拿咱的相片，看卡早結婚的時陣，你外緣投，穿好穿醜無計較，怪東怪西嘛袂曉，你的心我會永遠記條條，因為我是你的家後。 阮將青春嫁置恁兜，阮對少年著(就)跟汝跟甲老，人情世事嘛已經看透透，有啥人比你卡重要，阮的一生獻乎恁兜，才知幸福是吵吵鬧鬧，等待返去的時陣若到，你著讓我先走，因為我會嘸甘，看你為我目屎流。 【用字稽考】 ◎
有一日咱若老。 全句無問題。 ◎
「找」無人「甲」咱「友」孝。 ＊「找」是訓讀字。音/cau2
/讀音不對。改作「揣」，音/chue1
/，意思作「找揣」。聲韻、意思攏較適當。 ＊「友」音/iu2
/，意思作朋友，音對，但是意思毋𠍾。改作「有」，讀音/iu
2/，意思嘛𠍾。「有」是本字，無需要改用「友」字。 ◎
我會陪「你」坐「惦」椅「寮」。 ＊「你」改用古漢字「汝」有較適當。 ＊「惦」音/tian
7/，華語意思是掛念。聲調、意思完全無合。借用「踮」字，音/tiam3
/，有華語「在」的意思，聲、義講來較適當。 ＊椅「寮」音/liau5
/無錯，毋拘意思作「小屋」，完全講袂通。改作「條」音/liau5
/，意思指細長形的物件。比如長條、紙條仔。用即字上正確。 ◎
你有「外行」。 ＊「外」音/gua7
/，會使借用，但是意思無合。「行」音/hing5
–kiann5 /，音義攏無合。 改作「偌爻」音/lau7
gau5 /或者/gua7
gau5 /。「偌」是數量詞。「爻」雖是借用字，但是民間一直咧使用，普遍予人認同，應該是比「外行」兩字適當。 ◎
「吃」好、「吃」「醜」無計較。 ＊「吃」音/khit4
/。用法如：吃驚。音不對，嘛無「食」食的意思。改作「食」，音/ciah
8/。「食」是古漢字，音、義攏著，用即字上蓋正確。 ＊「醜」音/chiu2
–thiu2/。無咧讀作/bai2/。意思作下流的、惡質的。音無合、意思嘛講袂通。改作「□」音/bai2
/，本字是稻仔烏去的意思。華語借作「不好」的意思。音對、義嘛會使，擱是本字，上理想。可惜電腦打袂出來。一般用「歹」字來借用。 ◎
「你」的手我會「甲」「你」牽「條條」。 ＊「你」改作古字「汝」。 ＊
「甲」
音/kap
4–kah4 /，是程度上的用詞。比如：吵甲…。熱甲…。改作「共」音/ka7/。華語有「把」的意思。比如：共伊放袂記得。佇遮用即字「共」有較精密。
＊ 牽「條條」音/tiau
5/，可借用，但是意思全無合。改作「稠稠」音
/tiau 5/，有堅固、緊密的意思，講較會通。 ◎
阮將青春嫁「置」恁兜。 ＊「置」音/ti
3/，即字三調轉二調。有位置的意思。比如佈置、安置。音、義攏無足對同。改作「佇」/ti
7/，音七調轉三調，擱有「在某一地方」的意思，聲韻、意思攏無毋𠍾。用即字「佇」有較正確。 ◎
阮對少年「跟」「你」「跟」甲老。 ＊「跟」音/kin1
–kun1 /無合。改作「綴」音/tue3
/，有跟隨佇後面的意思。聲韻、意思攏會通。 ◎
有啥人比「你」「卡」重要。 ＊「卡」音/kap4–khah4
/，是英語card的譯音。入聲雖可借用，但是意思無合。改作「較」音/kah4，有比較、更加…的意思。音𠍾、意思嘛𠍾。 ◎
阮的一生獻「乎」恁兜。 ＊「乎」音/honn1 /，通常用佇文句的尾仔作疑問句。比如：遐是卜予我个乎？
換作「予」音/hoo7 /，意思作「給」「與」，後壁愛加受格。比如：予伊一杯水。聲佮意思攏會使。 ◎
等待「返」去的時陣若到。 ＊「返」音/huan2
/，音完全無合。換作「轉」音/tng2
/，擱有回去的意思。音義攏𠍾。 ◎
因為我會「嘸」甘。 ＊「嘸」字是借音造字，勿用較好。換作「毋」音/m7
/，有否定的意思。比如：毋通、毋願。音義攏講會通。 ◎
有「媳」婦「子」兒「友」孝。 ＊「媳婦」是華語的講法。咱台語有現成的古漢語「新婦」通用。當然是愛用本字。 ＊子」
兒，「子」音
/cu2 –ci 2/，音無合。改作「囝」音/kiann2
/。音義攏有合。 ◎
「你」若無聊「拿」咱的相片。 ＊「拿」音/na2
/，音無合。換作「提」音/theh8
/，華語有「拿」的意思。用即字有較適當。 ◎
你「外」緣投。 ＊「外」字改用「偌」字，道理頂面有講過。 ◎
穿好穿「醜」無計較。 ＊「醜」字換用「□」字，頭前已經說明過。 ◎
你的心我會永遠記
「條條」。 ＊「條條」改作「稠稠」，理由已經佇頂頭說明。 ◎
阮對少年「就」「跟」你「跟」甲老。 ＊「就」音/ciu
7/，即字是華語化的用詞。音無合。換「着」，音/toh8
–tioh8 /。第八調變第三調。音合意思嘛合。 ＊「跟」換作「綴」，前已作過說明。 以上該稽考的用字差不多攏看透透。雖然有某部份，南北學者抑有淡薄無仝的看法，當然遮的字嘛無法度百分之百受肯定。毋過阮絕對是按照台語使用的原則咧分析修改，無烏白來。實在講，台語若一直卜採用失去原音原字，擱經過華語思考硬拗出來的物件，莫怪予人看輕。親像劇名「親戚不計較」著是即款硬拗出來的半精白。照原則看，「親戚」應該改作「親情」，「情」音「cing5
–ciann5」，聲韻意思攏比「親戚」較適當。「不」音/put
4/，無「mai3」的發音。改用「勿」字。即字本字作「
」音/mai3
/，因為電腦需要，簡化作「勿」字。是華語「不要」的意思。音義攏合。有人用「莫」字，因為是借字，儘量猶是勿用。 台語若卜建立家己的主體性，予人會尊重，有需要呼籲咱遮的創作者，先建立台語的思考佮正確的用字觀念，逐家抱著使命感去拍拚耕作「台語的田園」，安爾，台灣本土文化較有希望再度發揚光大。 ※
尾後佇遮附上修改過的「家後」全部歌詞。 有一日咱若老，揣無人共咱有孝，我會陪汝坐踮椅條，聽汝講少年的時陣，汝有偌爻，食好食□無計較，怨天怨地嘛袂曉，汝的手我會共汝牽稠稠，因為我是汝的家後。 阮將青春嫁佇恁兜，阮對少年綴汝綴甲老，人情世事已經看透透，
有啥人比汝較重要，阮的一生獻予恁兜，才知幸福是吵吵鬧鬧，等待轉去的時陣若到，我會讓汝先走，因為我會毋甘，
放汝為我目屎流。 有一日咱若老，有新婦囝兒有孝，汝若無聊提咱的相片，看較早結婚的時陣，汝偌緣投，穿好穿□無計較，怪東怪西嘛袂曉，汝的心我會永遠記稠稠，因為我是汝的家後。 阮將青春嫁佇恁兜，阮對少年綴汝綴甲老，人情世事已經看透透，有啥人比汝較重要，阮的一生獻予恁兜，才知幸福是吵吵鬧鬧，等待轉去的時陣若到，汝著讓我先走，因為我會毋甘，看汝為我目屎流。
2-1-6
200
首頁古雅臺語人